شنت الفنانة تولاي هارون هجوما حادا على نقيب الفنانين زهير رمضان مقارنة بينه وبين نقيب المحامين الذي سعى للتخفيف عن زملائه في هذا الوقت الصعب فيما زهير رمضان اكتفى بتهديد الممثلين و كل من لم يرضخ بالويل و الثبور.
وكتبت هارون على صفحتها الشخصية على الفيسبوك:
الكورونا والنقابات
نحنا اليوم اول ايام الشهر الفضيل ينعاد عليكم بالخير والصحة.. ويبعد عنكم كل أذى وكل مرض يارب
بدي احكي كلمتين محشورين بحلقي بعد ما لفت نظري على مواقع السوشال ميديا الشكر الكبير من المحامين بكل المحافظات السورية للسيد نقيب المحامين الإستاذ الفراس فارس بنقابة المحامين يلي اتعاطف مع منتسبي نقابته بكل أفرع المحافظات بهذه المحنة بزمن الكورونا.. بقرار جرىء و نوعي و رجولي و #إنساني بهذا الزمن بصرف منحة مالية من صناديق النقابة ولو حتى أفلست النقابة.. و قبلها قام بصرف سلل غذائية من حسابه الخاص مع بعض الأعضاء و تم أيصال السلل لمنازل المنتسبين دون تكبيدهم أي عناء بهمة بعض المحامين و كان الهدف بسمو النفس و الاحترام إن المنتسب النقابي (ما يمد ايدو بتدين او ياخد معونة من ايا وزارة كانت.. ولا بيخلي زميله العضو ينهان وهو عم يطلب سلفة او منحة...)
شكرا استاذ الفراس فارس لاهتمامك بنقابتك يلي انتخبتك لتكون امين عليها بهيك ظروف.
ياريت تكون نقابة الفنانين لدينا بهذه الأنسانية و يأخدوا قرار جريء بصرف المنح من صناديق نقابتنا لزملائنا يلي هنن بالأساس لولاهن مافي مصاري بالنقابة ولا حتى هن صاروا أعضاء نقابة ويقولوا عندنا مليار بصناديقنا تفضلوا أذا مو وقت صرفها هلق بوقت أزمة الكرونا و رمضان و مافي شغل من عدة سنوات
حضرة النقيب.. هيي المصاري لهيك أزمة مو مشان يضلوا بالصندوق وتتبروظ فيهم..
انت بمنصبك مسؤول عننا نحنا الزملاء بهيك ظروف وممنوع تتهرب من المسؤولية وتزتنا لوزارة الشؤون الاجتماعية والعمل.. لانك بتعرف في فنانين ممكن يموتوا من الجوع ولا بيبعتوا أسمائهم لغير نقابتن بحكم حساسية الموضوع عند الفنان..
ورح نفرض جدلا انو الكل بعت للوزارة..
انت ليش ما بادرت وعطيت المتقاعدين ولا هدول ما بينتخبوا لهيك أصواتن مو مهمة.. ومافي داعي نهتم فيهم..
و ما بدنا تمثل علينا دور البطل وتقول رواتبهم 25 الف بتكفيهم.. أنتا ياترى بكفيك 25 الف لانو عيب علينا أمام المجتمع انو من أسس نقابة الفنانين ووصلك لمنصبها يكون هيك راتبه وحتى ما يستفاد بهيك ظرف من نقابته وانت من تمك قلت معك مصاري
فأنا بطالبك من منبري هذا وبتمنى زملائي يشاركوني هذا الطلب
يا اما بتطلع عالوسائل الاعلامية وبتقول في مصاري ورح نعطي منح للمتقاعدين.. ولكل متضرر من وباء الكورونا
او بتطلع وبتعترف بالعجز المالي ونحنا وقتا منعزرك
(أرحموا عزيزَ قوم ذُل) عيب......
ولاحظوا الفرق بين نقابة المحامين الرحيمة باعضائها
وبين نقابتنا يلي تركت كل شي و بلشت تهدد الممثلين و كل من لم يرضخ لها بالويل و الثبور اليوم أول يوم برمضان ياترى حسيتو مين صام وماقدر يفطر لأنو مامعو حسيتو شي أنا واثقة لا ياريت صوتي يوصل للكون كلو ساعدوني يوصل ساعدوني نساعد بعض ونوقف جنب بعض
يسرنا انضمامكم لقناتنا على تيلغرام : انقر هنا
