تسع سنين بقلم الكاتبة لبانة هاني حسن

تسع سنينْ
عم خيّط فساتينْ..
مدري للعمرْ..
مدري للقهرْ..
يمكن ما بعرف ل مينْ...

خوفي هالوقتْ
يمضى عالسكتْ
يكبكب دفا بلا عناوينْ...

فكري الزمن لعبة.. 
بنربحو ب محبة.. 
تاري الحلم كلّو مساكين..

مجروح متكي ع جروح
وبيت الندم مفتوح 
يلملم من ضلوعن الحنين..

ت يشعّل فين وجع
خايف...أنينو ينسمع
ت يشمّت فيه مجانين..
لمين العمر لمين....

لولا الورد اللي انزرع
ببلادنا بساتين.. 
لا فاحت سجدة عطر 
ولا غفي بالصلا زهر 
ينادي ل رحمتن آمين...

لمين العمر لمين...

و طيفن بزور البيت
بيصرخ للوجع مليت.. 
عمرك شفت أحياء مايتين..

لمين هالعمر لميين...

ودموعنا كمشة آمل
بتتنهد ع زند الزعل
بتنادي علين آمين..

توابيتن هيي الوطن
ذكراهن هيي الدين.. 
آمين آمين...