بتعرف شو الدّمعة
ولا بحكيلك...؟
يا وطن قلي..
شو باقيلك؟
غير نتفة حجر
صاير كرهان البشر
وعم تدفشن يطلعو
بحياتك زاعل الموت
جرب شي مرة تمنعو
صاروا الحبايب صور
يا وطن شوف القلب
مشتهي ضمِّة
متوحم ع لمِّة
ع خيال ب البال خطر
بتعرف شو القهر
ولا بشرحلك... ؟
فهمان شو يعني
تنسا وجه أهلك؟
وتلمحن بشي حدا...
بحياة ربك ذوق
صار العمر مخزوق
وصوتو مالو صدَى
شوفيها لو كنتْ
متل الأم أنتْ؟
وخبيتن ب تراب
كل ما مر الموت
يحسبن غيوم
أو شلة نجوم
هربانة من غيابْ
شو فيها لو كانوا
متل غيرن وخانوا
يمكن ضلو قرابْ!
بس
حكي ال "لو" كذاب
عرفان أصل التراب
منزّل من السّما بخور
شوف القبر مقهور
وبنفس الوقت فرحان
صاححلو يضم زهور
نيالو لو فتحلن باب
كل ليلة بيغفا ع طهر
وبيصحا ع آية
منزلة ب عز الضهر
وحواليها سهر
كل العادي انكسر
صورة وجهن ع المراية
ملاك...
لك شوفها اتحداك
بتضيع فيها
عم تضوي لياليها
ع الجنة شباك
كل العادي انكسر
دمن كان المطر
يلي بالوطن خلاك
حاج هيك بظن
حلك يا موت تحن
وتكف عنا بلاك
بترجاك،
#Lobana_hani_hasan
يسرنا انضمامكم لقناتنا على تيلغرام : انقر هنا
