مايهمنيش للشاعر وليد مليجي

مايهمنيش
إحساس فظيعْ
إنك تكون
طيِّب وديعْ
قلبَك ملاك
روح الحبيب
طايرة ف سماك
تضرب في ليل الضلمة
تزرع 100 أمل
تبدُر تقاوِي الكلمة
تحصد في الجُمَل
قلبك وَفِي
عقلك عَفِي
و تلاقي نفسَك
عند أغلى الناس وضِيعْ
إحساس فظيع
إنك تحبه
و اهتمامه بحد غِيِر .
إنك تصونُه
و يخدعك فيه الضميرْ .
إنك بتقلِب
كل دمعة فيه فَرَح
يفرح بغيرَك يخدعك
.....و انت الجميعْ
إحساس فظيع
إنك تكون له لحن
و يكون لك نشاز
إنك تكون له ماسة
و يكون لك حجر
إنك تحطه
أول الناس العزاز
لكن يشوفك
أي حد من البشر
فازاي تلومه
لو يخونك أو يبيع
إحساس فظيع
أنك تكون له الضحكة
يبقى لك دموعْ
إنه يكون لك فرد
و انتا له جُمُوعْ
إنه يخون العهد
و تكون له سنَدْ
يهجم عليك .....
لكن هناك خادم مطيع
إحساس فظيع
انك تحطُّه في السما
بإيديه يطول المستحيل
يهرب في ليلة مضلِّمة
مشتاق لإنه يكون ذليل
مربوط بمليون سلسلة
من دون غنم كل القطيع
إحساس فظيع
إنك تكون مخلص قوي
لكنه دايما مش هنا
قلبه هناك
روحه هناك
و انا مش ملاك
يفرح و بخيانته يعيش
ما يهمنيش
يكفيني عايش بالأمل
و كفاية هو صار .. مافيشْ

للشاعر وليد مليجي