إلى وزير التعليم العالي: صدق أو لا تصدق هذا ما يحدث في مشفى التوليد بدمشق؟!!

رسالة من مريضة الى وزير التعليم والى كل من فيه ذرة من الانسانية 

الرسالة كما وردت :

انا ولدت بمشفى التوليد الجامعي بدمشق ولادة طبيعية مارح احكي عن الوسخ والمعاملة البشعة كأن الواحد عم يتوجع ومبسوط بوجعو وصلت الساعه الواحد صباحا وحتى الساعه 3 حتى حولوني إلى الولاده طلعنا لفوق كل دكتور نفسية أكتر من التاني وكأنه بدو يقتل المرضى شوي تانية هنون طلاب أصلا عم يتعلموا ولا يوجد فوق رأسهم دكتور مختص.

واضافت علي .. ممنوع المرافقة تفوت مع المريضة .. الواحد بدو يتحمل الوجع ولا هالمعامله البشعه.. كان لازم تمرئ وكان الوقت عم يمر ببطء ولأن وحده هنيك مريضة متلي كان بدا تولد بس ساعدتني لقوم لان معد قدرت صرخوا بوجها الاطباء .. هون ماحدا بيساعد حدا كل واحد بيعين حالو
وتابعت علي حولوني على غرفه الولادة ولدت الحمد الله وأخيرا وأنا مو فهمانه شي وكوني اول ولادة طلعوا شاقيني كتير فكرت حالي خلص ولدت وخلصت هون بلش الوجع الحقيقي ولدت الساعه 5-الفجر من الساعه 5 للساعة 7 الا ربع وهنون عم يخيطوا الجرح وياريت مو الدم وكلشي تحتي انا متسطحه عليي فعليا وكلو واصل لظهري وبعد الولاده معروف الوحده بتبرد.

وقالت علي .. كان الخياط بدون بنج متت ساعتين وهنون عم يخيطوا قلتلو للدكتور مشان الله خدرني معد اقدر بيقلي انتي جاية ع مشفى عام مافي تخدير قلتلو يعني موت وانت عم تقطب معد اقدر قال هاد الموجود غير إنو إجت وحده شكلا اعلى منو أو شي عم تشوف شغلو بتطلع خياطتو غلط وبترجع بتعيد ورا وتعاملون كلو بجفاصة وقرف حسيت حالي بمكان لسرقة الاعضاء عنجد ماكان عندي حل إلا أصبر واستنى ليخلص كلشي خلصو وأخيرا وطلعو من الغرفه.

وتابعت علي… اجيت لقوم وتحتي كلو دم ومريولي دم لظهري واصل عم نادي المستخدمة إنو مابعرف شو لازم أعمل ماعم ترد اخر شي بتعيط عليي وبتقلي هي الغرف روحي ع شي غرفه وعدي رحت لشوف هالغرف كل 3 طالعين من الولاده على تخت كل وحده متسطحه على طرفا وبالمريول تبع الدم والقرف قلتلا للمستخدمه بدي غير مريولي قال لأ مافي غيرون قلتلا انا مابعد بهاد وكلو دم وبردانة بتقلي فوتي نقبري ع شي غرفه وخلص وحدة وقحة قلتلا شو رأيك تجي تضربيني كمان قال اي بضربك هون طار عقلي تركت كلشي ونزلت لتحت هيك متل ما أنا عم دور ع امي مشان اخد تيابي منا وغير نزلت لتحت لعند الاسعاف مالقيتا سئلت قلولي برا بالغرفه يلي عند الباب طلعت لعندا شافتني هيك وطار عقلا فوتتني غيرتليي هون طلعو المرييل عطوها مريول نظيف لبستني يا واجو لياخدوني حسيت حالي راجعه ع الموت ولله قلتلا مشان الله لاتخليون ياخدونيي خيطوني بدون تخدير موتوني طلعو الساعه 5 الفجر نازلين عند امي وعاطينا رشيته ابر تخدير وقلولا تروح تجيبا من مشفى المهايني وراحت جابتلون ياها واخدو الابر بس انا ماتخدرت رجعت طلعت لفوق ع اساس ساعه ويخرجوني.

وقالت علي .. نقلونا إلى قسم تاني وليي على القرف لك الدم على التخوت لامخدات ولا شراشف على التخوت ولاشي على الجلد بتتسطح الوحده والجلد كلو دم وقرف ملزق عليي على قد مابكيت بدي ماما شفقت عليي دكتورة هنيك وطلعتلي امي شوي هاد كلو صارت الساعه 9 الصبح وأنا لهلأ مو شايفه بنتي واسأل عنا ماحدا يرد حمام مقطوعه ميتو هيك للساعه 12 ونص لخرجوني والحمد الله بنتي مافيا شي .

وأضافت علي رجعت ع البيت الوجع مابينحمل بقيت 11 يوم كل يوم يزيد اكتر من اللي سبقه رحت عند دكتورة طلع الخياط غلط ومو مسكرين الجرح تاركينوا مفتوح لهيك كل الوجع كان وعم يبلش يلتهب الله لايوفقون ان شا الله اذا مشفى عام هيك بيعاملو العالم.

وتابعت علي معد شي يقدم ولا يأخر خلص ولدت وتعذبت ومشي الحال بس ياريت تنشرا بركي حدا بيستفيد من هالتجربه وماحدا يروح يولد فيا ويتعذب ولتكمل معي اليوم رجعت عند الدكتورة الجرح ماعم يلحم بدي شق وخياط من أول وجديد الله يصطفل فيكون يارب وياخد حق وجعي وعذابي.

السيد وزير التعليم العالي هذه الحادثة حدثت بتاريخ 23شهر كانون الثاني الماضي إذا كان هذا ما يحدث في المشفى كحالة فردية يرجى التدقيق ومحاسبة المقصرين وإذا كان حالة عامة لا نجد أي مبرر لاستمرار عمل المشفى حفاظا على أرواح من يراجعها .